Компанийн засаглалыг хөгжүүлэх үндэсний хөтөлбөрийн хүрээнд Санхүүгийн зохицуулах хороо, Монголын хөрөнгийн биржтэй хамтран компанийн засаглалын кодексийн хэрэгжилтийг хангуулах ажлын хэсэг байгуулан ажиллаж байгаа бөгөөд ажлын тайлангаа олон нийтэд мэдээллээ.
Компанийн засаглалын үнэлгээний ажлын хэсэг 30 хувьцаат компанийн хувьцаа эзэмшигчдийн хуралд хөндлөнгийн ажиглагчаар оролцож урьдчилсан байдлаар дүгнэлтээ гаргажээ. Уг дүгнэлтээр ХК-иудын дийлэнх нь хөндлөнгийн үнэлгээ хийх судлаачдыг нааштайгаар хүлээн авсан бөгөөд энэ нь мэдээллийн ил тод байдлыг хангах мөн судлаачдын зөвлөмж, шүүмжийг хүлээн авах цаашид тусган, ажил хэрэг болгох сонирхолтой байгааг илэрхийлсэн байна.
МХБ нь компанийн засаглалын бие даасан нэгжтэй болсон бөгөөд ТОП-20 индексийг бүрдүүлэгч хувьцаат компаниудын ТУЗ-ийн дарга нартай сайн засаглалтай ХК болохоор хичээж ажиллах тухай “ТУНХАГ БИЧИГ”-т гарын үсэг зурж хамтран ажиллаж байна. Тус ажлын хүрээнд МХБ-д бүртгэлтэй ХК-иудын үүргийн хэрэгжилтийн байдал, хувьцаа эзэмшигчдийн хурал зарласан компанийн тоо, хурлын материал ирүүлсэн байдал болон санхүүгийн тайлан ирүүлэлт зэрэг нь өнгөрсөн онтой харьцуулахад 3%-иар нэмэгдсэн байна.
Мэдээлэл өгөх үеэр МХБ-ийн Гүйцэтгэх захирал Д.Ангар Хөрөнгийн бирж өөрийн мэдээллээ нээлттэй, ил тод болгон ажиллаж байгаагаа дурдаад, бүртгэлтэй хувьцаат компаниуддаа үлгэр болж ажиллаж буйгаа илэрхийллээ.
Дашрамд дурдахад Монголын хөрөнгийн бирж нь Авлигатай тэмцэх газрын “АВЛИГААС АНГИД, САЙН ЗАСАГЛАЛЫН САЙН САНААЧЛАГА” өргөмжлөлийг 2014 оны 12 дугаар сард хүртсэн билээ.

 

 Маркетинг, олон нийттэй харилцах алба

МОНГОЛЫН ХӨРӨНГИЙН БИРЖ